Вы просматриваете: Главная > ԽՈՀԱՆՈՑ, ՌՈՒԼԵՏՆԵՐ, ԳԼԱՆԱԿՆԵՐ > Բիսկվիթային ռուլետ «Թավշե սիրտ»

Բիսկվիթային ռուլետ «Թավշե սիրտ»

Այս «Թավշե սիրտ» բիսկվիթային ռուլետը սիրո արտահայտության ևս մի յուրահատուկ հաղորդագրություն կարող է հանդիսանալ:

«Թավշե սիրտ» բիսկվիթային ռուլետի պատրաստման համար անհրաժեշտ  բաղադրիչներն են՝

ձու — 10հատ

շաքարավազ — 300 գ

խտացրած կաթ — 150 գ

մածուն — 200 մլ

թթվասեր — 100 գ

կարագ — 150 գ

բուսայուղ — 150 մլ

սոդա — 1թ. գ

աղ — 1պտղունց

ալյուր — 300 գ

կարմիր գունանյութ

կակաո — 20գր

կաթնային շոկոլադ — 80գր:

«Թավշե սիրտ» բիսկվիթային ռուլետի պատրաստման եղանակն է.

խմոր պատրաստելու համար թասի մեջ ջարդել ձուն, ավելացնել շաքարավազը և լավ հարել մինչ սպիտակելը:

Մեկ այլ թասի մեջ մածունին ավելացնել սոդան, խառնել, ապա, անընդհատ հարելով, քիչ-քիչ լցնել բուսայուղն ու հարել այնքան, որ ստացվի միասեռ զանգված: Փոքր չափաբաժիններով ավելացնել ձվի զանգվածին: Այնուհետև քիչ-քիչ ավելացնել աղն ու ալյուրը:

Բաժանել 2 մասի: Մի մասին ավելացնել գունանյութն ու կակաոն, խառնել:

Գունավոր խմորը լցնել յուղապատ կաղապարի մեջ մոտ 1.5-2սմ հաստությամբ և թխել 20ր՝ 180 ˚C տաքացրած ջեռոցում:

Թողնել հովանա, բարակ շերտով հեռացնել երեսը, ապա սրտաձև կաղապարով սրտեր հանել, իսկ մնացորդները փշրել:

Ռուլետի համար նախատեսված խմորն էլ թխել նախորդի նման, սակայն ուղղանկյուն կաղապարում և այնպես, որ խմորի հաստությունը լինի 1-1.5սմ:

Որպեսզի ռուլետն ընդունի ցանկալի ձև, ջեռոցից հանելուց անմիջապես հետո շերտը դնել փայտե գորգին փռված սրբիչի վրա և անմիջապես ծալել 2 կողմից հավասարապես՝ եզրերը դեպի ներս կորացնելով: Թողնել մոտ 1 ժամ՝ հովանա:

Այդ ընթացքում պատրաստել կրեմը. հալված կարագը հարելով սպիտակեցնել: Քիչ-քիչ ավելացնել խտացրած կաթը, լավ հարել: Ապա մաս առ մաս ավելացնել նաև թթվասերը: Պետք է ստացվի թույլ կրեմ:

Զգուշությամբ բացել ռուլետի շերտը, կրեմ քսել, կտրտած սրտիկները շարել մի կողմի վրա՝ հնարավորինս կիպ դասավորությամբ: Կրեմապատել և վերականգնել ռուլետի նախկին տեսքը:

Պատրաստի ռուլետը կրեմապատել և թավալել գունավոր բիսկվիթի փշուրների մեջ:

Շոկոլադը հալել գոլորշու վրա և յուղաթղթի վրա խոհանոցային ներարկիչով սրտեր նկարել:
Սառչելուց հետո զգուշությամբ հեռացնել յուղաթղթից: Ստացված սրտիկներով ձևավորել ռուլետը:

«Թավշե սիրտ» բիսկվիթային ռուլետը պատրաստ է:

Метки: ,


Оставить отзыв