Եղնջահաց

Մատղաշ եղինջը պարունակում է բավականին շատ վիտամիններ, ամինոթթուներ ու միկրոտարրեր։ Այն լայն կիրառություն ունի ինչպես ժողովրդական բժշկության մեջ, այնպես էլ խոհանոցում։ Թարմ եղինջից թխված հացը ոչ միայն առողջարար է, այլ նաև ունի հիանալի համ և բույր։

Եղնջահաց պատրաստելու համար անհրաժեշտ են՝

ալյուր – 400գր

ջուր – 200 մլ

թարմ եղինջ – 100 գ

թարմ սամիթ – 1 կապ

խմորիչ – 10 գ

կարագ – 30գ

շաքարավազ – 1 թ. գ

աղ — 1 թ. գ

քունջութ – 1 ճ․գ:

Եղնջահացի պատրաստման եղանակն է․

լվացած եղինջը խաշել եռացող ջրում 1-2 րոպե, հանել և անմիջապես լցնել սառր ջրի մեջ, որպեսզի գույնը պահպանվի:

Բլենդերի մեջ լցնել կտրտած եղինջն ու սամիթը, ավելացնել շաքարավազը և տաք ջուր (կարելի է օգտագործել այն ջուրը, որում խաշվել է եղինջը): Լավ հարել, որ դառնա միասեռ զանգված: Տեղափոխել խմորի համար նախատեսված թասի մեջ, ավելացնել խմորիչը և թողնել տաք տեղում 10-15 րոպե:

Այնուհետև, ավելացնելով հալված կարագը, աղը և ալյուրը, փափուկ խմոր հունցել: թողնել 1.5 ժամ տաք տեղում, որ հասունանա:

Դրանից հետո խմորին գլանի ձև տալ և տեղափոխել յուղաթղթի վրա: Եվս 1 ժամ թողնել հասունանալու համար:

Ապա, թրջելով երեսը, վրան քունջութ ցանել:

Թխել նախապես 190˚C տաքացրած ջեռոցում 35 րոպե:

Այս հացը կարելի է մատուցել մսի, կարտոֆիլի, բամջարեղենային աղցանների հետ: