Խոզի ազդրամիսը՝ ջեռոցում

Ամանորյա սեղաններին արդեն ավանդական դարձած այս ուտեստն ունի պատրաստման բազում եղանակներ:

Ջեռոցում պատրաստվող խոզի ազդրամսի բաղադրիչներն են՝

խոզի ազդրամիս – 2-2.5 կգ

սոխ – 1 գլուխ

սխտոր – 5 պճեղ

ծիտրոն – 3-4 ճյուղ

լոլիկի հյութ (թանձր) – 50 մլ

գինու քացախ – 3 ճ.գ

մանանեխի մածուկ (паста горчицы) – 2 ճ.գ

բալի օշարակ – 50 մլ

աղ, կարմիր պղպեղ – ըստ ճաշակի:

Ուտեստի պատրաստման եղանակն է.

խոզի ազդրամիսը լվանալ և թողնել սառը աղաջրի մեջ 12 ժամ: Հանել աղաջրից և թեթևակի չորացնել:

Մանր կտրտած սոխը, ճզմած սխտորը, ծիտրոնը, լոլիկի հյութը, 2 ճ.գ քացախը, աղը, կարմիր պղպեղը և մանանեխի թանձրուկն իրար խառնելով՝ պատրաստել թանձր մարինադ:

Ազդրամսի վրա կտրվածքեր անել, պատել մարինադով, տեղավորել պոլիէթիլենային տոպրակի մեջ, ամուր կապել և 6-12 ժամ թողնել սառը տեղ:

Մարինացված ազդրամիսը փաթաթել փայլաթիթեղի մեջ և եփել 1.5 ժամ, 180-190 °C տաքացված ջեռոցում: Հանել ջեռոցից, վրայից հեռացնել մարինադից մնացած սոխի և սխտորի մնացորդները:

Բալի օշարակը, խառնելով 1 ճ.գ քացախի հետ, ջնարակ պատրաստել և դրանով պատել խոզի ազդրամիսը:

Կրկին տեղափոխել ջեռոց՝ 15-20 րոպեով՝ մինչև կարմրելը:

Կարելի է մատուցել խորոված խնձորների հետ: