Вы просматриваете: Главная > ԱՐՎԵՍՏԱ ԳԵՏՆԵՐ, ԲԱՆԱՍՏԵՂԾ ՈՒԹՅՈՒՆՆԵՐ, ԳՐԱԴԱՐԱՆ, ԳՐՈՂՆԵՐ, ՄԻՔԱՅԵԼ ՆԱԼԲԱՆԴՅԱՆ > Իտալացի աղջկա երգը

Իտալացի աղջկա երգը

«Մեր հայրենիք, թշվառ, անտեր,

Մեր թշնամուց ոտնակոխ,

Յուր որդիքը արդ գանչում է

Հանել յուր վրեժ, քեն ու ոխ»։

«Մեր հայրենիք շղթաներով

Այսքան տարի կապկապած,

Յուր քաջ որդոց սուրբ արյունով

Պիտի լինի ազատված»։

«Ահա՛, եղբայր, քեզ մի դրոշ,

Որ իմ ձեռքով գործեցի,

Գիշերները ես քուն չեղա,

Արտասուքով լվացի»։

«Նայի՛ր նորան, երեք գունով,

Նվիրական մեր նշան,

Թո՛ղ փողփողի թշնամու դեմ,

Թո՛ղ կործանվի Ավստրիան»։

«Ինչքան կին մարդ, մի թույլ էակ,

Պատերազմի գործերում

Կարե օգնել յուր եղբորը,

Զանց չարեցի քո սիրուն»։

«Ահա՛ իմ գործ, ահա՛ դրոշ,

Շուտ ձի հեծի՛ր քաջի պես,

Գնա՛ փրկել մեր հայրենիք,

Պատերազմի վառ հանդես»։

«Ամենայն տեղ մահը մի է,

Մարդ մի անգամ պիտ մեռնե․

Բայց երանի՜, որ յուր ազգի

Ազատության կը զոհվի»։

«Գնա՛, եղբայր, աստված քեզ հույս,

Ազգի սերը քաջալեր,

Գնա՛, թեև չեմ կարող գալ,

Բայց իմ հոգին քեզ ընկեր»։

«Գնա՛ մեռիր դու քաջի պես,

Թող չտեսնե թշնամին

Քո թիկունքը, թող չասե

Թե վատն է իտալացին»։

Ասաց․ տվեց օրիորդը

Յուր եղբորը մի դրոշ,

Մետաքսից էր, ազնիվ գործած,

Ու երեք գույն կար որոշ։

Եղբայրն առավ և ողջունեց

Յուր սիրեկան քնքուշ քույր,

Առավ զենքը, սուր, հրացան,

Հեծավ յուր ձին սևաթույր։

— Քույրի՜կ, — գանչեց քաջ պատանին, —

Մնա՛ս բարյավ, սիրեկան,

Այս դրոշակին պիտի նայի

Ամբողջ բանակն իտալյան։

Նա սո՛ւրբ է ինձ, երբ մկրտված

Արտասուքով ու կնքված,

Դու հանձնեցիր ինձ հիշատակ,

Հայրենիքի նվիրված։

Թե մեռանիմ, դու մի՛ սգար,

Իմացի՛ր որ տարեցի

Դեպի մահու արքայություն

Իմ հետ քանի թշնամի։

Ասաց․ վազեց դեպի հանդես

Ավստրիացոց հանդիման,

Յուր արյունով գնել հավերժ

Ազատություն  իտալյան։

Ո՛հ, իմ սիրտը կտրատվում է

Տեսանելով այսպես սեր

Դեպի թշվառ մի հայրենիք,

Որ ոտնակոխ ընկած էր։

Սորա կեսը, կեսի կեսը,

Գեթ երևար մեր ազգում․

Բայց մեր կանայք․․․ ո՜ւր Եղիշե,

Ո՜ւր մեր տիկնայք փափկասուն։

Ո՜հ․․․ արտասուք ինձ խեղդում են,

Այլ չեմ կարող բան խոսել․

Չէ՛․․․ թշվառ չէ Իտալյան,

Եթե կանայք այսպես են։

ՄԻՔԱՅԵԼ ՆԱԼԲԱՆԴՅԱՆ

Метки: , ,

Обсуждение закрыто.