Խաշած կամ խորոված բազուկի յուրահատուկ քաղցրահամությունը շատերն են սիրում։ Իսկ տարբեր համեմունքների ու քացախի հավելմամբ այն դառնում է անկրկնելի ուտեստ, որը կարելի է ճաշակել ընթրիքին, մատուցել որպես ճաշալրաց այլ ուտեստների հետ կամ վայելել բանջարեղենային աղցանի հետ միասին։
Բալզամիկ քացախով և հազրեվարդով խորոված բազուկ պատրաստելու համար անհրաժեշտ են՝
բազուկ – 3 հատ
ավոկադոյի կամ այլ բուսայուղ – 1 ճ․ գ․
բալզամիկ քացախ – 1 ճ․ գ․
թարմ հազրեվարդ – 3 — 4 ճյուղ
բանջարեղենի համար նախատեսված փունջ – ըստ ցանկության
աղ։
Բալզամիկ քացախով և հազրեվարդով խորոված բազուկի պատրաստման եղանակն է․
Կեղևազրկած ու միջին հաստությամբ շերտատած բազուկը շարել յուղաթղթով ծածկված ջեռոցի տապակի մեջ, առատորեն ցողել բուսայուղի, բալզամիկ քացախի ու կտրտած հազրեվարդի խառնուրդով և տապակել 200 ˚C տաքացրած ջեռոցում մոտ 30 – 40 րոպե՝ մինչև բազուկի փափկելն ու պատրաստ լինելը։
Ջեռոցից հանելուց անմիջապես հետո, անհրաժեշտության դեպքում, համեմել աղով և համեմունքների փնջով։
Ուտեստը մատուցել տաք վիճակում՝ ձևավորելով հազրեվարդի ճյուղով։