Լոլիկով ու պղպեղով տապակած հավի կրծքամիսն իր շատ համեղ, հյութեղ և գրավիչ համ ու բույրով կդառնա շատ տանտիրուհիների այցեքարտը։ Այս՝ շատ արագ ու հեշտ պատրաստվող ուտեստը տոնական տեսք կհաղորդի ցանկացած սեղանի։
Պղպեղով և պանրով տապակած հավի կրծքամիս պատրաստելու համար անհրաժեշտ են՝
հավի ամբողջական կրծքամիս – 1 հատ
բուլղարական քաղցր գունավոր պղպեղ – 1 հատ
պանիր՝ պինդ տեսակի – 100 գ
սոյայի թանձրուկ – 25 մլ
մայոնեզ – 50 գ
մանանեխի մածուկ – 1 ճ․ գ
բուսայուղ – 3 ճ․ գ
աղ
ջուր – 0,5 բաժակ։
Պղպեղով և պանրով տապակած հավի կրծքամսի պատրաստման եղանակն է․
լվացած ամբողջական հավի կրծքամիսը մակերեսորեն թեքությամբ շերտատել միմյանցից 1-1,5 սմ հեռավորությամբ այնպես, որ կրծքամսի տակի և մեջտեղի հատվածները մնան ամբողջական։ Թեթևակի համեմել աղով ու յուրաքանչյուր հատվածի մեջ դնել մեկական կտոր պանիր ու շերտատած պղպեղ։ Ի դեպ, պանրի ու պղպեղի հետ համատեղ կարելի է հատվածների մեջ լոլիկի կամ կարտոֆիլի բարակ շերտեր տեղադրել։
Սոյայի թանձրուկն ու մանանեխի մածուկը խառնել մայոնեզի հետ և վրձնով քսել կրծքամսի վրա։
Ջեռոցի տապակի մեջ լցնել բուսայուղը, տարածել, ավելացնել ջուրն ու վրան տեղադրել հավի կրծքամիսը, ծածկել փայլաթիթեղով ու եփել նախօրոք 180˚C տաքացված ջեռոցում 20 րոպե, ապա հանել փայլաթիթեղը և շարունակել տապակել 25-30 րոպե՝ մինչև տապակի մեջի հեղուկն ամբողջովին գոլորշիանա, իսկ կրծքամիսը ձեռք բերի ոսկեգույն երանգ։
