Այս ուտեստի յուրաքանչյուր պատառ ներծծված է մյուս բաղադրիչների անզուգական համերով, որի արդյունքում դառնում է անկրկնելի։
Բանջարեղեններով տապակված հավի փափկամիս պատրաստելու համար անհրաժեշտ են՝
հավի փափկամիս – 0,5 կգ
գազար – 1 հատ
բուլղարական պղպեղ – 2 հատ
կծու տաքդեղ՝ ըստ ճաշակի – 1 հատ
բրոկկոլի – 200 գ
սոխ – 1 գլուխ
կանաչ լոբի՝ թարմ կամ պահածոյացված – 100 – 150 գ
նեխուր – 1 – 2 ցողուն
համեմ – մի քանի ճյուղ
բուսայուղ
քունջութ
համեմի սերմ
բահար
չորացրած ուրց
կարմիր աղացած պղպեղ
աղ։
Բանջարեղեններով տապակված հավի փափկամսի պատրաստման եղանակն է․
միջին կրակի վրա դրված թավայի տաք բուսայուղի մեջ տապակել մոտ 3 x 3 սմ չափսով կտրտած հավի փափկամիսը մինչև ոսկեգունելը, ապա տեղափոխել ափսեի մեջ։
Նույն թավայի մեջ թեթևակի տապակել կտրտած սոխը, ապա ավելացնել կտրտած կծու տաքդեղն ու բուլղարական պղպեղը, գազարը, շերտատած նեխուրը և տապակել մի քանի րոպե։ Այնուհետև ավելացնել միջին չափսի ծաղկաբույլերի բաժանած բրոկկոլին, կտրտած կանաչ լոբին, տապակել 3 – 5 րոպե, որից հետո թավայի մեջ վերադարձնել մսակտորները, ծածկել կափարիչով ու այդ ամբողջը միասին տապակել մարմանդ կրակով մինչև պատրաստ լինելը։
Վերջում համեմել աղով, բահարով, կարմիր պղպեղով, համեմի սերմով և ուրցով։
Մատուցել տաք վիճակում՝ ձևավորելով կտրտած համեմով ու ցողելով քունջութի սերմերով և թավայում առաջացած թանձր հյութով։